"რძალმა მთელი ოჯახი გაგვამწარა"
ჩემმა მამიდაშვილმა რამდენიმე წლის წინ ცოლი მოიყვანა. თავიდან მამიდა ამ ქორწინების წინააღმდეგი იყო. თვლიდა, რომ მისი შვილი ოჯახის შენახვას ვერ შეძლებდა, რადგან უმუშევარი იყო. მარტო ბიძაჩემის პენსიითა და მამიდის მცირე ხელფასით ბევრს ვერაფერს გახდებოდნენ, ისედაც ძალიან უჭირდათ. შვილს სთხოვდა, ცოტა მოიცადე, სამსახურს იშოვი, იქნებ ჩვენც გავიმართოთ წელში და მერე არავინ არაფერს დაგიშლისო. ისიც უნდა ვთქვა, რომ სარძლო ქართველი არ იყო (ეროვნებას შეგნებულად არ დავასახელებ, რომ არავის დარჩეს საწყენად) და მამიდას არც ეს სიამოვნებდა. ეშინოდა, რომ სხვა ტრადიციებით, რელიგიით გაზრდილი ქალი მის ოჯახის ადათ–წესებს ვერ შეეგუებოდა. ჩემმა მამიდაშვილმა თავისი გაიტანა, ის გოგო ცოლად მოიყვანა – გაიპარნენ.
ბიძაჩემმა ეს ამბავი რომ გაიგო, ცოლს უსაყვედურა, ყველაფერი შენი ბრალია, იცოდი და არაფერი მითხარიო. საქმე სერიოზულ დაპირისპირებამდე მივიდა, სიტუაცია იმდენად გამწვავდა, რომ მამიდა ცოტა ხნით ოჯახიდანაც კი წავიდა. დასთან გადავიდა.
ნათქვამია, ჩათრევას ჩაყოლა სჯობიაო და მე და ჩემმა მეორე მამიდაშვილმა ყველაფერი გავაკეთეთ, რომ რძალი ოჯახში წესიერად მიგვეღო. ქორწილი ვერ გადავუხადეთ, მაგრამ კარგი სუფრა გავუშალეთ, ნათესავები დავპატიჟეთ და თბილად მივიღეთ. მამიდა არ მოვიდა, თქვა, ჩემმა ქმარმა უცხო ხალხთან კიდევ რომ მომაყენოს შეურაცხყოფა, ვერ ავიტანო. რძალს კი შეუთვალა, რატომაც იყო ოჯახიდან წასული.
თანდათან ყველაფერი თავის კალაპოტში ჩადგა, მამიდაც დაბრუნდა სახლში, ბიძაჩემიც შეეგუა სიტუაციას. თავიც როგორღაც გაჰქონდათ, მაგრამ მერე სხვანაირად წარიმართა ცხოვრება. რძალმა თავისი "მშვენიერი" ხასიათი გამოავლინა და ოჯახი აირია. ჩემს მამიდაშვილს ძმაც შეაძულა და მშობლებიც. მასთან ისეთი ენები მიჰქონდა, რომ აგიჟებდა. მერე კი ჩემი მამიდაშვილი, გამხეცებული, ოჯახში ყველას ეჩხუბებოდა. ნათესავებსაც კი გადმოგვწვდა. მას დღემდე არავინ ეპატიჟება სუფრასთან, რადგან ეშინიათ, რომ აყალ–მაყალს ატეხს და სტუმრებს შეურაცხყოფას მიაყენებს. მისი ძმა და მშობლები სახლიდან წავიდნენ და ნაქირავებ ბინაში ცხოვრობენ. წარმოიდგინეთ, პატარა გოგომ იმდენი მოახერხა, ოჯახის წევრები ერთმანეთს დააშორა. მამიდაშვილი მეცოდება, რადგან ცოლი მთელ ცხოვრებას დაუმახინჯებს.
"სარკის" ერთგული მკითხველი
